Í bili sita vit innibyrgd. Bilrúturin er sum eitt annað sjónvarp, har ið vit sita sum passivir eygleiðarar. Men á súkklu er eingin rútur. Tá ferðast tit ikki bara fram við øll hesi náttúrustøðini – tit ferðast í teimum.  

Tað finnast nógvir mátar at ferðast í egnum landi. Men at súkkla oyggj í oyggj er ein heilt serlig uppliving. Vegakervið í Føroyum er framúr, og nærum allar oyggjarnar eru knýttar saman við undirsjóvartunlum, brúgvum og ferjum. Tit kunnu súkkla heilt úr Viðareiði til Gásadals – í einum. 

10 teir bestu súkklutúrarnir

HAVIÐ Í HUGA

Neyðug súkkluútgerð

Súkklan skal hava klokku, hvítt endurskin framman, gult endurskin á pedalunum og hjólunum og reytt endurskin aftan. Hetta er serliga umráðandi í tunlunum og í myrkri annars. Slík ljós kunnu keypast í súkkluhandlum kring landið. 

At súkkla við børnum

Er mann eldri enn 15 ár, kann mann hava tvey børn, sum eru yngri enn 8 ár, við á súkkluna, um súkklan er gjørd út til hetta. Børnini skulu sita íbúndin, uttan mun til um tey sita í barnastóli ella súkkluvogni.

Ferðslureglur

Súkklið altíð á høgru síðu, og um súkklubreyt er til taks, so súkkla tit á henni. Gevið tekin við arminum, tá ið tit annaðhvørt seta ferðina niður, snara ella steðga. 

Hjálmur

Tað er ikki lógarkrav at súkkla í hjálmi, men tað er tó ikki býtt.

TIL REIÐAR?

Tit hava hópin av møguleikum, vilja tit súkkla í Føroyum. Tit kunnu leiga ymiskar súkklur frá Rentabike.fo og ARA Tours  so sum e-súkklur, fjallasúkklur og hybrid-súkklur. Skal súkklan á verkstað, kunnu tit vitja Súkkluverkstaðið hjá Gunnari og Rentabike.fo.