Tey duga væl at spæla fótbólt, og teimum dámar væl at tosa um fisk. Hóast Norðoyggjar eru seks ymiskar oyggjar, so eru norðoyingar eitt fólk – á sama hátt sum suðuroyingar eru suðuroyingar, og eysturoyingar eysturoyingar. 

Síðan Norðoyatunnilin lat upp – og eisini Eysturoyartunnilin – er tað bert eitt hanagleiv norður í myrkrið. 

Her eru fjøllini hægri, hamrarnir grefligari, og veðrið meira óútrokniligt. Ein fjallatúrur í Norðoyggjum er ikki fyri sartar sálir. Og tað er júst tað, sum lokkar. Tey, sum ganga fjøll, og sum hava sett sær fyri at ganga øll fjøllini í landinum (tann listin telur 340 fjøll) hava eisini ein annan lista: Topp 10-listan, sum fevnir um tíggju tey hægstu fjøllini í landinum. Sjey teirra eru at finna í Norðoyggjum. 

Klaksvík

Næststørsti býurin í landinum hevur sína heilt serligu sjarmu. Upprunaliga var Klaksvík ikki ein bygd, sum seinni vaks til bý. Nei, her vóru upprunaliga fýra bóndagarðar: Vágur, Myrkjanoyri, Gerðar og Uppsalir, og ikki fyrr enn í 1938 løgdu tey saman til bý.

Klaksvík er ‘basin’ hjá tykkum, tá ið tit rannsaka Norðoyggjar. Hiðani er ferja út í Kalsoynna og tunnilin Norður um Fjall til hinar oyggjarnar. 

Í Klaksvík fáa tit fatur í øllum, sum tykkum tørvar. Komin oman frá einum fjallatúri, hvussu við ein túri í sauna í svimjihøllini? Eru tit svong, so eru nógvar matstovur í at velja. Og hava tit gloymt okkurt eftir við hús, so fæst tað mesta til keyps her í fiskivinnuhøvuðsstaðnum.

Sigl, oyggj, fram úr mjørka, nú ert tú eitt skip

– Chr. Matras (Viðoy, 1926)

Ein øðrvísi súkklitúrur 

Kalsoyggin hevur eyknevnið blokkfloytan, og tað er ikki ringt at gita hví. Leiðin frá Trøllanesi til Syðradals sær soleiðis út: Trøllanes–tunnil–Djúpidalur–tunnil–Mikladalur–tunnil–Ritudalur–tunnil–Hattardalur–tunnil–Húsar–Syðradalur. Hetta ger tað serliga áhugavert at súkkla í Kalsoynni. 

1. Mangla tit súkklu? Tað eru ráð fyri tí! Tit kunnu leiga súkklur í Kalsoy, nett og júst sum ferjan leggur at. 
2. Minnist til endurskin (Trøllanes–tunnil–Djúpidalur–tunnil … noyðast vit at endurtaka?)
3. Ein súkklulykt er eisini neyðug – og ein góð pannulykt kemur helst eisini væl við.
4. Tað eru bert bilførarar, sum noyðast at bíleggja billett til ferjuna frammanundan, so um tit fara til Kalsoyar við súkklu … ja, ella, tit súkkla ikki til Kalsoyar – tó at tað helst bert er ein spurningur um tíð, nær ið tey eisini fáa undirsjóvartunnil, so væl teimum dámar tunlar. – Ná, hvar vóru vit? Jú, um tit fara til Kalsoyar við súkklu, so er ikki neyðugt at bíleggja billett frammanundan. Tit kunnu tó líka spyrja starvsfólkið, hvar ið tit skulu seta súkkluna frá tykkum, tá ið tit eru komin umborð.
5. Tá ið tit leggja at á Syðradali, so kunnu tit bíða, til allir bilarnir eru komnir í land, tí so hava tit vegin fyri tykkum sjálv. 

Kort