Eitt munnu flestu føroyingar semjast um – í Føroyum er gott at vaksa upp. Her er einki tivoli, men her er náttúra, og fyri børnini er hon tað besta spæliplássið. Um tit fara við flaka í fjøruna ella við flugutráðu í hagan, so er tað dagur í viku hjá børnum. Og á hvørjari einstakari oyggj er okkurt stuttligt at uppliva. 

Hvat er so at finna uppá? Hvar fer mann? Hvussu fyrireikar mann seg, tá ið mann ferðast við børnum? Børn eru sjálvandi ymisk, men flestu teirra eru ikki so krevjandi, tá ið tað snýr seg um ítøkiligar ætlanir. Ofta sæst, at um foreldrini eru spent, so eru børnini eisini spent. Vit hava tó funnið alt møguligt spennandi fram til tykkum, sum tit kunnu fáa íblástur frá.

YMISKT BARNAVINARLIGT AT FARA TIL

Til alla barnafamiljuna

ÚT AT ETA VIÐ BØRNUM

Michelin-stjørnur? Hvat er tað? 

Børn tíma ikki altíð at eta tað sama sum tey vaksnu. Tað merkir tó ikki, at mann ikki kann fara út at eta og hava børnini við. Møguleikarnir eru nógvir. Høvuðsstaðurin er í dag vorðin á tremur við kaffistovum og matstovum. Tit kunnu eitt nú fara í HAPS at njóta ein burgara. Tá ið børnini hava sagt manga takk, kunnu tey seta seg at spæla PlayStation, meðan tit njóta ein kaffimunn omaná. Skal tað vera eitt sindur fínari, so er Katrina Christiansen eitt gott mið. Café Paname hevur nógv borðspøl – og serstakliga góðar køkur. Og finst nakað barn, sum ikki dámar køku? Café Kaspar hevur eisini borðspøl (umframt tær tiltiknu beyglurnar). Skal tað vera eitt sindur sunnari, so vitjið Bitan í Steinatúni ella Systrar í Norðurlandahúsinum. 
 

HUGSKOT TIL DAGSTÚRAR

Hjá børnum (og kanska summum vaksnum?) eru so nógvar fjarskotnar bygdir at vitja fyri fyrstu ferð. So nógv nýggj støð at uppliva. Her eru hugskot til nakrar stuttligar dagstúrar til tykkara: 

• Koyrið til Tjørnuvíkar. Minnist til at steðga við Fossá at taka myndir. Tá ið tit koma til Tjørnuvíkar, so verður viðmælt at royna vaflurnar. 
• Koyrið til Sands ella Skopunar og leigið vatnsúkklu. Tað tíma børnini, tað er so bæði vist og satt.
• Siglið til Kalsoyar. Har kunnu tit síggja gravsteinin hjá James Bond, kópakonuna og vitja eina kaffistovu við heimsins enda. 
• Koyrið ein túr til Gjáar og farið og eygleiðið fugl. 
• Siglið til Suðuroyar. Har er nógv at uppliva – gongutúrar, spælipláss, søvn, kaffistovur o.s.fr.
• Siglið til Nólsoyar og vitjið Ovasavnið.