Dagfesting | 26. juni 2026

Nýggj hagtøl frá Hagstovu Føroya vísa, at stutttíðarleiga er ein stórur og týðandi partur av gistingartilboðnum til ferðafólk í Føroyum.

Í 2024 vórðu umleið 1.200 eindir bodnar út til stutttíðarleigu kring landið. Talan er serliga um sethús, íbúðir og kømur, men eisini um aðrar eindir sum neyst og húsvognar. Til samanberingar eru knapt 900 hotelkømur í Føroyum. Mátað í tali av seingjarplássum er rúmføri (kapasiteturin) á privata stuttíðarleigumarknaðinum sostatt munandi størri enn hjá gistingarhúsunum. 

Sambært uppgerðini gistu umleið 90.000 gestir í stutttíðarleigu í Føroyum í 2024. Samanlagt vórðu skrásettar umleið 359.000 fólkanætur, og 95 prosent av gestunum vóru útlendsk ferðafólk. Til samanberingar vóru 244.586 fólkanætur skrásettar á gistingarhúsunum.

Stutttíðarleiga skapar inntøkur kring alt landið og gevur ferðafólki fleiri og fjølbroyttari gistingarmøguleikar. Hon er eisini við til at loysa eina rúmførisavbjóðing í ferðavinnuni, serliga í háárstíðini og í økjum, har fá siðbundin gistingartilboð eru. Samstundis vísa tølini, at stutttíðarleiga er ein vaksandi partur av bústaðarmarknaðinum, og tí er neyðugt at hyggja nærri at, hvussu hesin marknaður kann mennast á ein hátt, sum bæði tænir ferðavinnuni og tekur hædd fyri bústaðarpolitisku avbjóðingunum.